頂一期寫「莊松榮藥房」第一擺佇《教會報》刊廣告ê時間是1933年5月（《教會報》578卷）。這期iáu有一個真有意思ê現象，tō是對這期開始，《教會報》將四個醫生館ê廣告kā刊做伙，連續8個月久。這四間病院是：嘉義十全醫院、台南青峰醫院、燕巢瑞安醫院、大甲德仁醫院。這四間病院ê家族故事，會使對台灣早期教會史講到今仔日。下面筆者紹介這四間病院ê院長以及in ê 後代對教會、社會ê影響。

※十全醫院

「十全病院」ê創設者是林朝乾醫生。林朝乾，嘉義人。伊是台北醫專第一屆ê畢業生。醫專畢業後，伊有去東京進修，the̍h醫學士ê學位。林朝乾有領導能力，佇醫專ê時，伊bat做過「醫專青年會會長」，mābat 做過彰化基督教病院ê院長、私立博愛救濟院ê董事、嘉義盲人中心ê董事。佇教會，伊是嘉義東門教會ê長老、主日學校長、國際基甸會嘉義分會會長。林朝乾嘛真有疼心，佇醫專ê時，當伊知影有同學因為經濟ê原因無法度繼續讀冊，伊就揣2、3個同學對這ê有困難的同窗chhun-chut幫贊ê手。這位受幫贊ê同學，畢業了去馬來西亞，佇hia做醫生，幫贊濟濟艱苦人。頂面ê資料是對盧萬德長老（筆者ê主日學老師）佇1966年6月初一《教會報》寫ê〈故林長老朝乾小傳〉整理出--來-ê。

林朝乾醫生娶陳老英長老ê三女陳全員。後來林朝乾醫生kap伊ê後生ê事業攏有「全」--字。這字是對陳全員來--ê。

林朝乾日本時代佇嘉義開「十全醫院」。大子林慶秋kap太太簡玉華開「十全幼稚園」。二子林慶中，國防醫學院畢業，接辦嘉義ê十全病院。三子林慶國，台大醫學院畢業，佇台北開ê病院嘛叫十全，到今仔日iáu teh幫贊艱苦人。佇教會，頭前已經講過，林朝乾是嘉義東門教會ê長老。下一代林慶秋嘛擔任嘉義東門教會ê長老。林慶國佇台北，是第一教會ê長老。

※青峰醫院

台灣早期ê教會史，台南劉光求家族一定愛講--tioh。劉光求生瑞仁、瑞琛、瑞山、錫五。劉錫五這房，查甫有清風、青黎。青峰醫院ê劉清風to̍h 是劉錫五ê後生。

劉清風1900年佇台南出世，台南讀「尋常小學校」。了後，去日本讀同志社中學。日本同志社中、大學ê創辦人是新島襄（日本人佇外國the̍h大學學位ê第一人）。台灣人去日本讀同志社中學ê人真濟，親像林茂生、陳能通、陳清忠、高天成……。劉清風住這款氣氛中（特別受林茂生影響）去日本讀同志社中學。同志社中學畢業，伊去美國讀大學讀冊，入South Dakata大學，1924年畢業。畢業後擱入印第安那大學ê醫學院讀醫科。佇1926年畢業，the̍h MD ê學位。劉清風無想tioh，伊佇印第安那大學the̍h醫學士學位，soah創造一項「台灣第一」。Tō是伊是台灣人頭一個佇美國讀醫學院擱the̍h著醫學士學位ê人。

劉清風轉來台灣，佇台南開「青峰醫院」（1929年6月）。1931年伊kap日本東京女子醫專畢業ê莊采芳結婚。結婚後兩人做伙佇清風病院醫治患者。1940年11月，日本人要求戴仁壽醫生ài佇24點鐘內離開台灣。戴仁壽離開後，接戴醫生「樂山園」工課ê人tō是劉清風。

對文獻看起來，劉清風早期可能有「祖國意識」。伊佇美國醫學院ê畢業證書正名用日本羅馬字寫Seifu Ryu。括弧寫chin-feng Liu（注1），無用台語白話字。伊美國畢業後去中國上海復旦大學生物系做教授mā兼做系主任。真有可能佇二次大戰戰後，感受著中國人無公道對待台灣人。伊後來真清楚表明伊ê「台灣獨立」立場。這款日本時代，對「祖國」有期待，戰後soah變台獨ê例真濟，劉清風m̄是孤例。

寫到chia，beh kā大家講一項我心內ê小祕密。劉姃姃是劉清風ê查某子。我高中佇嘉義北榮教會參加聖歌隊ê時，劉姃姃是指揮。我決定後擺娶某ê時，欲娶有氣質ê某，是看tio̍h姃姃姐以後決定--ê。

註一：朱真一《台灣早期留學歐美的醫界人士》（台北：望春風，2004）頁50-  56。

【更正】

《新使者》157期筆者寫〈莊松榮ê「全鹿丸」kap蘇振輝ê「人生醫院」〉。有淡薄錯誤，下面是更正ê文字：

佇莊松榮藥房這部份，筆者寫莊松榮藥房是莊溫萌先生開--ê。按呢寫m̄對。莊松榮藥房開始ê人是莊溫萌ê阿公莊文作先生。1873年（清同治12年）佇旗後開設「莊松榮藥房」。多謝莊孝武兄提供正確ê資料。

林燕臣佇1933年用「上主」這個詞（68頁）。後面，筆者ê文章寫：《紅皮本台語聖經》講『上主』是取一字基督教『上』字，天主教一字『主』字，以後chiah有『上主』這個詞，這種了解絕對m̄對。頂面ê文字有小可亂--去。筆者欲表達ê意思是：「有人講，《紅皮本》以後，chiah有上主這個詞是m̄對-- ê。」