主內南衡兄：

平安！

真多謝你kap查經班ê兄姊用心研讀《現代台語譯本新約聖經》，koh寫出恁ê〈讀經筆記〉。有人án-ni認真研讀，現代台語譯本ê翻譯kap審議小組ê成員受tio̍h真大ê鼓勵。

阮tī頂禮拜有針對你所寫ê使徒行傳〈讀經筆記〉1-8來討論。我受託將討論ê結果報你知。

1. 1:13，阮決定繼續採用「激進黨」這个名詞，不過，照你所講，第一字tio̍h大寫，做「Kek-chìn-tóng」。

2. 1:26，阮無同意《聖經啟導本》ê解說。liam-khau á是抽籤、搖籤，形式無仝，卻lóng是beh揣求上帝ê旨意。阮決定繼續使用較有台灣味ê「liam-khau」。

3. 2:37，「心內真chhì-chha̍k」這句，意思不只是「心感動」。不過，阮有決定修訂做「心親像hō͘ 針chha̍k--tio̍h」。

4. 阮保留「nā-sī」ê用法。

5. 有關「hōaⁿ-chhiú」kap「àn-chhiú」ê用法。小組tī翻譯時有一个原則：有關醫病或是賞賜聖神等，用hōaⁿ-chhiú；有關任命（禮儀），用àn-chhiú。阮也有對頭檢查一遍，修訂版應該會有一致性。

6. 有關「húi-pòng」kap「siat-to̍k」ê用法。húi-pòng ê對象是人，siat-to̍k ê對象是上帝（á是「上帝ê話」、「上帝ê名」）。6:11 阮修訂做「húi-pòng摩西」kap 「siat-to̍k上帝」。阮也有對頭檢查一遍，修訂版應該會有一致性。

7. 7:26，小組成員iáu無一致ê看法。研議中。

8. 7:46，阮遵照聖經原文ê表達，無修改。

9. 7:51，阮研議後，原文意思應該m̄是pōe-ge̍k，決定繼續使用「反抗」。

10. 8:7等，有關中文使用『癱瘓的』，阮詳細檢查一遍，全部採用「半身不遂」（如馬太4:24; 8:6）。

11. 現代台語版聖經盡量無koh再使用帶有「歧視性」ê用詞。可比講『瞎子』改做「失明的」等。Pái-kha--ê 有歧視ê含意，所以改用kha-pái--ê。

12. 8:20，小組認為chòe-hé khì sí，用華語講，真『傳神』，是chiok súi ê台語。保留。

13. 有關「靈語」ê使用。阮查考原文，確定出tī聖靈，但m̄是講出某一地方使用ê言語，別人無法度理解--ê，一律翻譯做「靈語」。

14. 11:4，阮修訂做「對頭一項一項kā in soat-bêng」。

15. 11:23，「tāi-ke」抑是「ta̍k-ê」ê問題。原文指「單獨--ê」á是「眾人中ê個別一個人」，翻譯做「ta̍k-ê」；原文指them、all 的，翻譯做「tāi-ke」。

16. choan-sim chi̍t-ì，討論後維持原翻譯。

17. 11:24，有關欠一个連接詞ê問題。小組早先tī修訂ê時，已經加上「hit-sî」。

Koh 再一遍講：真多謝，願上帝賜福你。

現代台語譯本聖經翻譯暨審議小組 組長 張宗隆

陳南州  代筆

2012/4/23