|
白話字《教會報》到1969年3月就是最後一期矣。我péng最後幾期ê《教會報》，無意中佇1967年12月看著王孟冬長老ê「消氣散」廣告。真感心！佇chhun無幾個廣告ê時，伊猶原支持文字事工。這陣想--起—來，真正愛Kā伊講：「多謝！」
Hit期ê《教會報》王孟冬長老刊兩項藥á：一項是「人參養血酒」；一項是「消氣散」。「人參養血酒」治「腰骨痠痛、風濕痛、不眠症、小孩chhōa尿」。「消氣散」治「胃痛、腹痛、消化不良、一服見效」。左手邊落名「台南信誠製藥公司」，今仔日咱干單欲討論「消氣散」。「消氣散」ê廣告1967年12月是用漢字寫，我péng出khah早用白話字ê廣告是按呢寫：「“腸胃病”特效藥。親愛ê朋友：你有腸胃無好mah?抑是常常感覺tù- tù？抑是溢酸水？請你吃“消氣散”就會好lī-lī。」看起--來，王長老用白話字寫khah有感情。
吳秋微kap王孟冬
欲購「消氣散」一定愛講tióh王孟冬長老。欲了解王孟冬長老，愛先知吳秋微醫生。吳秋微，澎湖人。1913年總督府醫學校畢業，1914年佇台南市開「壽生醫院」。1931年，吳秋微醫生擱對台北醫專畢業。佇台南市、長老教會真濟人bat--伊、數念--伊。黃武東牧師ê《黃武東回憶錄》寫黃武東牧師神學院三年級ê時，bat破病到耳孔無聽--著。彼時，黃武東牧師ê醫生就是吳秋微醫師。
王孟冬長老ê阿伯王西頓khah早信主，讀南神。老父王常，身軀生歹物件，去新樓病院予馬雅各醫生（二世？）開刀，欠新樓病院錢，王孟冬長老就去吳秋微醫師hia做藥局生。王孟冬長老ê醫學知識是對吳秋微醫生來--ê。特別，吳秋微醫師手頭有馬雅各醫生留落--來ê藥方。這本藥方共200頁，處方有百外種，全名是《東方熱帶病ê治療kap藥方》，用羅馬字寫的。吳秋微醫師叫王孟冬長老抄送予醫界ê朋友。佇抄寫ê過程，王孟冬長老mā為家己抄一份。王嘉男兄kā我講，這項代誌，吳秋微醫師知影（註）。「消氣散」ê來源tō是這本冊。
王孟冬長老出社會開西藥房，第一ê所在m̄是台南，是玉井。《教會報》有忠實紀錄。1935年7月，王孟冬長老佇《教會報》刊「安生堂藥房」ê廣告。這份廣告刊到1939年8月。戰後王孟冬長老擱一擺刊廣告ê時，是1960年11月到1967年底，佇《教會報》刊「消氣散」ê廣告。就是白話字報紙teh beh消失ê時。會使講，伊是文字事工ê『鐵粉』。
王嘉男兄kā我講，「信誠製藥」m̄是大公司。是小本經營。做「消氣散」ê時，是照馬雅各醫師ê藥方。Kā 甘草、大hông、小蘇打、樟腦油等八項藥á合起來。這項藥，因為用藥頂真，效果好，佇台灣社會、教會真受肯定。台灣教會老一輩ê兄姐，nā是腹肚無爽快，攏緊Kā「消氣散」吞--落，長老教會開總會ê時，我bat聽講，王孟冬長老攏會送議員這項藥á。王孟冬長老後來擔任台南太平境教會ê長老，熱心傳福音。信誠製藥ê員工，禮拜日攏愛kap伊去太平境教會禮拜。廖明發牧師是佇這ê過程中信主--ê。「消氣散」講到chia，會使講，到一個khám- chām矣。毋拘，王孟冬長老後來ê故事mā kap台灣ê歷史有牽連，所以，故事愛繼續擱寫--落—去。
王幸男事件kap張女士
王孟冬長老ê大公子王幸男先生，寄郵包傷著謝東閔副總統。這項代誌，對王長老、長老娘以及「消氣散」攏造成真大ê影響。王幸男兄做這項代誌對台灣ê影響是啥物？這m̄是本文所欲討論--ê。這項代誌愛予後來ê歷史學家去寫。我khah注意ê是，這項代誌發生無偌久，佇台南發生ê事。
代誌過無偌久，一個出名姓張ê女基督徒作家去太平境教會禮拜。禮拜後kā張宗隆牧師討王孟冬長老ê住址。這位作家去王孟冬長老in兜，王長老無佇厝，是王嘉男兄接待伊--ê。
伊表明來意，是欲寫『王幸男炸傷謝東閔事件始末』。 嘉男兄有看著張女士ê前言寫：『王幸男出生於台灣基督長老教會家庭，用郵包炸傷一個慈祥的老人…』。 Hit時，張女士等無著王長老，就提前離開台南，到老父轉--來，嘉男兄就將這項代誌報告予老父知，王孟冬長老認為張女士是欲借這個機會攻擊長老教會，就叫嘉男兄去電報局拍電報，Kā張女士講：「張oo女士，我堅決反對你編印王幸男炸傷謝東閔之書，王孟冬敬啟」。電報連續拍三、四日，警備總部ê人khà電話來王家，電話是嘉男兄接--ê。嘉男兄講：「電話彼邊講：阮決定無欲出版這本冊，請m̄通擱拍電報予張女士。」
王幸男佇彼陣予人掠去綠島關。轉來台灣，做過台南縣政府機要秘書。對台南ê序大人有真大ê貢獻。毋拘，因為王幸男出代誌。王孟冬長老、長老娘心神艱苦，身體衰弱。就停掉製藥公司，「消氣散」就按呢佇台灣消失矣。
講「消氣散」會使牽出戰前戰後台灣ê醫藥史、政治發展史、生活史。咱ê身軀邊一定iáu真濟這款故事。逐家做伙來講這款古，好--無？
註：2017/8/12台北東門教會訪問王嘉男長老。
|