2011年3月11，日本發生驚天動地ê大地震。地牛翻身引起「津波」（tsu-ná-mi：海漲），kā 庄頭lòng kah歪哥tshih-tsua̍h，濟濟人流離失所，福島第一、第二核電廠ê原子爐mā險險á爆炸。講起來若像是「無影無跡」，總是，漏洩出來ê放射線佇空中phōng-phōng-ing、四界湠，甚至流對海底、土裡去矣！對政府ê處理方式不滿kap反對核電ê市民力量自按呢開始佇日本滾絞，無外久tsit葩火mā燒對咱台灣來矣，到tann m̄-bat對核電議題表態ê民眾，佇街頭、網路串連發聲，有寡演藝人員mā公開發言，呼籲中止核四廠ê建設。

齊藤和義（Saito Kazuyoshi）是日本有名ê實力派歌手，伊佇地震了無外久，就隨kā過去1條真受歡迎ê歌曲「ずっと好きだった」(一直teh佮意你)，改寫作「ずっとウソだった」（攏teh嚎滫）。Melody好聽好記，歌詞koh刮洗有關單位刮洗kah足siak-pha̍h，佇網路頂引起濟濟回響。Tsit條充分反映日本人心內ê驚惶kap憤怒ê歌曲，自按呢佇3.11了後ê各種遊行場，予人傳唱、放送。

核電災害佇日本已經m̄是頭1遍。1999年，佇斉藤出世大漢ê故鄉栃木縣（totsigi）65公里外ê茨城縣（ibaraki）mābat發生東海核電JCO臨界事故，彼陣伊雖然心內要意，但是無任何動作；到kah tsit遍ê福島事件，伊感覺真後悔，m̄-tsiah趕緊kā「ずっと好きだった」(一直teh佮意你) tsit條歌改寫作「ずっとウソだった」（攏teh嚎滫），提醒逐家毋通koh相信啥物「安全神話」（anzen shinwa）。

透過廣告、贊助等等ê手段，日本ê電力公司對媒體有真大ê約束力，演藝人員若beh唱（tshiàng）明家己ê反核立場，tiō ài有失去khang-khuè ê覺悟，所以只好用較婉轉ê方式來表達。斉藤較厲害ê是， 伊今年佇紅白歌唱比賽雖然啥物話攏無講，m̄-koh吉他揹帶面頂，tshia̍h大大字ê「NUKE IS OVER」，猶是受著媒體足大ê注目kap報導。

我佇日本已經蹛幾若冬，斉藤ài beh表達--ê，我mā真有同感。佇tsia，我ka tsit塊「ずっとウソだった」，翻譯作siāng有法度傳達我ê情緒ê台語，kap逐家分享。

= = = = = = = = = = = = = = = = = = = = = = = = = = = = = = = = == = = = = = = = =
 

「ずっとウソだった」攏teh嚎滫（hau-siâu）！

詞曲：斉藤和義( Saito Kazuyoshi)
 
この国を歩けば原発が54基
教科書もCMも言ってたよ   安全です

行佇tsit-ê國家，原子爐有54座，
課本kap電視廣告攏講，百面妥當、絕對安全ê啦!

俺たちを騙して   言い訳は「想定外」
懐かしいあの空   くすぐったい黒い雨

出代誌就kā咱騙，tsuāinn講是按算袂著（ê 災害）！
予人數念ê彼片青天，uè-suè koh烏sà-sà ê雨suah落來矣！。
 
ずっとウソだったんだぜ  やっぱバレてしまったな
ほんとウソだったんだぜ  原子力は安全です
ずっと嘘だったんだぜ   ほうれん草食いてぇなあ
ほんと嘘だったんだぜ   気づいてたろうこの事態

根本攏teh嚎滫啦！tann出代誌矣！
恁真正攏teh嚎滫啦！講啥物核能絕對安全？！
恁根本攏teh嚎滫啦！我想beh食pue-lîng-á菜啦！
恁真正攏teh嚎滫啦！tsit-má知矣nih！代誌大條矣ho̍onnh！

風に舞う放射能はもう止められない
何人が被曝すれば気がついてくれるの    この国の政府

放射線四界ing，tsa̍h mātsa̍h袂tiâu矣！
是ài外濟人受害，政府才會kā咱tsùn-būn？！

この街を離れてうまい水見つけたかい？
教えてよやっぱいいや   もうどこも逃げ場はない

離開tsia，敢tōchhoe有清氣e水？！m̄tō緊kā我報一下！
啊！mài bāng 矣！咱是連走mā走無路矣！
 
ずっとクソだったんだぜ  東電も北電も中電も九電も
もう夢ばかり見てないけど
ずっとクソだったんだぜ  それでも続ける気だ
ほんとクソだったんだぜ  何かがしたいこの気持ち
ずっと嘘だったんだぜ    ほんとクソだったんだ
 
聽恁teh放屁啦！東京電力(公司)、北海道電力、中部電力、九州電力。
恁tsia-ê酣古我無beh koh信矣！
恁根本teh放屁啦！攏已經按呢矣，koh想beh繼續起（核電廠）？！
恁真正攏teh放屁啦！實在想beh做寡代誌（來改變）……
恁根本攏teh嚎滫neh！真正有夠屎啦！