|
美國當自由，賺錢機會多，當輒講到个「美國夢」就係大家相信，有錢就做得翻身做有錢人。故所當多人移民去美國，因為大家个文化無共樣，有時會打逆到變冤家，「歧視（discrimination）」个情形就有可能會出現。美國本常就有「講笑」个文化，用喜劇个表演反映自家生活，總係講笑裡背有對移民个歧視、種族个冤仇拿來做講笑个「材料」，這兜「地獄哏（hellish gags）」、「不政確」个講笑話也出現到喜劇个表演底背。
這恁多年來，單口喜劇（stand-up comedy）在台灣乜時行，頭擺移民社會就有歧視，對少數人个族群，像客家人、原住民、新住民、身心障礙个人、還有性少數个人，全部放到喜劇，變做刻板印象，壓迫到佢等。Ngaiˇ 想到「一个身體有盡多肢體」个經文：「人只有一個身體，總係有盡多肢體；肢體雖然盡多，還係一個身體。基督个身體也係像恁樣。毋單淨恁樣，Ngaiˇ 等無論係猶太人抑係外邦人，係做奴隸个抑係自由人，全部已經通過共一位聖靈來領洗禮，成做一個身體，共下享受共一位聖靈。……一個肢體受苦，所有个肢體就相共受苦；一個肢體得光榮，所有个肢體就相共快樂。」（林前十二 12～13、26）
Ngaiˇ 等無論種族、性別、性取向、身體狀況也係相同，假使你係基督徒，你就係基督身體个一部分。喜劇做得分人笑，消蝕（sat）忒生活个艱苦，看到社會無公義个地方，這係喜劇个優點。
Ngaiˇ 兜全部係基督身體个一部分，共下受苦、共下快樂。假使用喜劇創造出其他人个地獄，就無想到基督个身體。無論你仰般寒，都做毋得用別人个血燒暖自家，因為Ngaiˇ 兜共樣係基督个身體。
|