母語影音入口
2022 這一冬 ê 年初，露西亞入侵烏克蘭。Chit-má 年尾，kun-lūn ê 烏克蘭人民 kap 政府戰 hō͘ 世界看，in 有較贏露西亞。戰爭發生了後，國際社會 chù-ba̍k 看烏克蘭，嘛不時看 ùi 灣這 pêng 來。中國有欲侵略台灣，全世界攏知知。總--是，台灣 kap 烏克蘭 pí-phēng，有一項相像，嘛有一項各樣。
相像--ê 是邊仔攏 tuà 歹厝邊。莫怪烏克蘭一下受侵略，國際 liâm-mi 想著台灣。若講各樣 hit 項，就是烏克蘭領土 kap 歹厝邊結相 uá，咱台灣 kap 歹厝邊中央隔一條黑水溝。露西亞戰車駛--leh，就會使去到烏克蘭；若中國，著 ài 渡海，in ê 兵仔才有才調行 kha到。毋過，雖罔是 án-ne，雖罔戰車駛--leh 就會到位，烏克蘭人嘛無 tī 戰爭開始 hit 陣 liâm-mi tú 著露西亞兵仔。In 代先 tú 著露西亞飛彈。
Kap 歹厝邊中國中央有台灣海峽 keh-tn̄g ê 台灣閣較是 án-ne。美國智庫 kap 情報單位一直咧警告，未來十冬內，中國準定武裝攻擊台灣。中國動手 ê 時，咱 kap 烏克蘭仝款，會代先 tú 著中國飛彈。根據烏克蘭 ê 經驗，歹厝邊絕對會第一時間轟炸重要 ê 公共設施：電廠、水壩……，遮 ê 所在；烏克蘭 ê 經驗嘛 kā 咱講，露西亞、中國嘛仝款，in ê 武器 àu 古比率誠懸，也就是重要設施邊仔 ê 民生設施恐驚會去牽拖--tio̍h。
猶閣有另外一項 ài 考慮，he 就是中國渡海真正困難。軍隊代先著 ài tī 中國東南沿海聚集。干焦這 ê 軍事行動 tō 會致使台灣、美國、日本來反應。準做開船，嘛著 ài 六點鐘到八點鐘才有法度登陸。Tī 遐爾 á 長 ê 時間內底，中國軍隊 tī 海面上嘛會成做咱國軍、美軍 ê 箭靶 á。
綜合遮 ê 因素來看，中國武裝攻擊台灣 ê 手路絕對是代先射飛彈；嘛閣飛彈 phah 著目標到咱真正看著中國兵仔，時間是真長。也就是講，咱較贏中國 ê 機會，就是 tī 飛彈攻擊了後維持社會無亂。咱 ê 全民國防，上重要 ê 工作，事實上是知影去 tó-uī 走閃飛彈、救護、彼此鬥相共、主動保持冷靜、共同維持秩序……，遮 ê 工課。
見若做會到遮 ê 代誌，準做中國武裝攻擊，嘛真 oh 控制台灣。姊妹兄弟，你敢有看--著？咱干焦疼厝邊，就會當較贏中國。疼厝邊，這咱基督徒上 gâu，敢毋是？
|